Isa 25 | NdeBEN | STEP | Oh Thixo , wena unguNkulunkulu wami; ngizakudumisa ngibabaza ibizo lakho ngoba ngokuthembeka okupheleleyo, wenze izinto ezimangalisayo, izinto ezamiswa endulo.

Isaiah 25

Dumisani UThixo

1 Oh Thixo, wena unguNkulunkulu wami;
ngizakudumisa ngibabaza ibizo lakho
ngoba ngokuthembeka okupheleleyo,
wenze izinto ezimangalisayo,
izinto ezamiswa endulo.
2 Wenze idolobho laba yinqwaba yemfucuza;
idolobho elivikelweyo laba lunxiwa,
inqaba yabezizweni kayiseyilo dolobho;
kayiyikwakhiwa futhi.
3 Ngakho-ke abantu abalamandla bazakudumisa,
amadolobho ezizwe ezilolunya azakwesaba.
4 Ubuyisiphephelo sabayanga,
isiphephelo soswelayo osizini lwakhe,
isivikelo phakathi kwesiphepho
lomthunzi ekutshiseni kwelanga.
Ngoba umoya wabalesihluku
unjengesiphepho sitshayeka emdulini,
5 lanjengokutshisa kwasenkangala.
Wena uthulisa umsindo wabezizweni;
njengokutshisa kusehliswa ngumthunzi weyezi,
ithuliswa kanjalo lengoma yaba lesihluku.

6 Phezu kwale intaba uThixo uSomandla uzakwenzela
abantu bonke idili lokudla okumnandi,
idili lewayini elidala,
inyama enhle kakhulu lewayini elihle kakhulu.
7 Phezu kwale intaba uzadiliza
isembeso esimboze abantu bonke,
ilembu elembese izizwe zonke;
8 uzakuginya kokuphela ukufa.
UThixo Wobukhosi uzakwesula inyembezi
ebusweni babantu bonke;
uzasusa ihlazo labantu bakhe
emhlabeni wonke.
UThixo usekhulumile.
9 Ngalolosuku bazakuthi,

“Ngempela lo nguNkulunkulu wethu;
sethemba kuye, wasikhulula.
Lo nguThixo, sethemba kuye;
kasithokozeni sithabe ngokusisindisa kwakhe.”

10 Isandla sikaThixo sizahlala phezu kwalintaba;
kodwa uMowabi uzanyathelelwa ngaphansi ezweni lakhe
njengotshani bunyathelelwa phansi emqubeni.
11 Bazakwelulela izandla zabo kuye,
njengenhlambi iselula izandla zayo ukuba intsheze.
UNkulunkulu uzakuqeda ukuzigqaja kwabo
phezu kokuhlakanipha kwezandla zabo.
12 Uzadiliza izinqaba zenu eziphakemeyo
azibhidlizele phansi;
uzazidilizela phansi emhlabathini,
kulo kanye uthuli.